تاند( چار شنبه، د جوزا ۲۵ مه) د افغانستان پخواني ولسمشر حامد کرزي نن په یوه مطبوعاتي اعلامیه کې يو ځل بيا له طالب چارواکو وغوښتل، چې د نجونو تړلي ښوونځي بېرته پرانیزي.
نوموړي په دغه اعلاميه کې ويلي:« د هېواد د مختلفو ولایتونو دیني علماوو له شپږم تولګي نه تر دولسم تولګي پورې د نجونو د ښوونځیو د پرانیستلو مکرره غوښتنه کړې چې په دوام یې دا ځل د بادغیس علماوو له اسلامي سرپرست حکومت څخه د نجونو د ښوونځیو دوباره پرانیستل وغوښتل.»
اعلامیه زیاتوي:« پخوانی جمهور رئيس په افغانستان کې د تعلیم د ودې لپاره د علماوو د غږ درناوی کوي او له اسلامي سرپرست حکومت څخه غواړي چې د افغان ولس خصوصاً د دیني علماوو دې غوښتنې ته احترام وکړي او د نجونو ښوونځي پرانیزي.»
حامد کرزی ټینګار کوي، چې له پردي احتیاجه د هېواد د خلاصون لاره یوازې او یوازې له پوهې او تعلیم سره نغښتې ده.
دا غوښتنه په داسې حال کې ده، چې ویل کیږي له څو ورځو راهيسې بيا په کندهار کې د طالبانو د مشرانو غونډه روانه ده، څو د نجونو د ښوونځيو د برخليک په ګډون د هېواد پر یو شمېر مهمو موضوعاتو بحث او پریکړې وشي.