د افغانستان د تابعیت تذکرې درلودل د هر افغان قانوني مسوولیت او مکلفیت دی چې په هغې کې د شخص نوم ، تخلص او یا کورنۍ نوم ، د پلار او نیکه نوم ، عکس یا تصویر ، د زېږېدو دقیقه نېټه او ځای ، د تذکرې د اعتبار موده ، د اوسېدو اصلي ځای لکه کلی ، ولسوالۍ یا ناحیه او ولایت ، قومیت او ملت ذکرشوی وي .
د افغاني تذکرې په درلودلو سره افغانان کولای شي ، ښوونځی ، مدرسه او پوهنتون ولولي ، د فراغت اسناد ترلاسه کړي ، د مځکې ، کور ، دکان ، موټر او نورو منقولو او غیرمنقولو ملکیتونو پېرل او پلورل پرې وکړي ، په رسمي او خصوصي دفترونو کې کار او په نظامي برخه کې د هېواد دفاع خدمت ترسره کولای شي . هغه کسان چې رسمي تذکره ونه لري ، امنیتي مسوولین له هغوی نه باید قانوني پوښتنه وکړي او د شک پروخت کې تر پوښتنې ، حبس او جریمې لاندې راتلای شي .
د پاسپورت درلودل د هر افغان حق دی ، خو اخیستل او درلودل ئې بیا اختیاري دي . پاسپورت له هېواده د باندې د شخص هویت ثابتوي او هغه وخت اعتبار لري چې د مقیم هېواد او یا هغه ځای ته چې وغواړي سفر وکړي ، اعتبار لرونکې ویزه ولري .
ویزه محصلینو ته د تحصیل ، کارګرانو ته د کار ، ګرځندویانو او سیاحینو ته د سیاحت ، دولتي کارمندانو او مامورینو ته د کاري او رسمي سفر، مریضانو ته د تداوي ، حاجیانو او زایرینو ته د حج او زیارت کولو او نورو مقصدونو لپاره د هغو هېوادونو د سفارتونو او قونسلګریو له خوا د یوه معین وخت لکه 15 ورځې ، یوه میاشت ، شپږ میاشتې او یا یو کال صادریږي . دیپلوماتانو ته د هغوی د ماموریت ترپایه ورکول کیږي . هغو کسانو ته چې مېرمن او یا مېړه ئې په کوم بل هېواد کې اوسي ، د هغوی د فامیل اوماشومانو د یوځای کېدو لپاره ویزه ورکول کیږي . که کوم افغان په بل خارجي وطن کې اوسي ، هغه کولای شي خپل فامیل ، مور او پلار ، ورونه او خویندې د یوه معین وخت لپاره دعوت کړي چې هغوی ته هم ویزه ورکول کیږي .
کله چې د ویزې موده او اعتبار پای ته رسیږي باید ژرتر ژره تمدید او یا خپل هېواد ته مراجعت وکړي .
بنا که څوک پورته مواردو لپاره ضرورت نه لري نو د پاسپورت اخیستل دوی ته هېڅ ګټه نه لري .