تاند(يکشنبه، د جوزا ۲۲ مه) له کندهار او میدان وردګو ولایتونو څخه د دوو جلا پېښو په ترڅ کې د دوو ځايي طالب چارواکو د وژل کیدو او ۲ ساتونکو د ټپي کیدو خبر ورکړل شوی.
کندهار کې خبري سرچينو ويلي، چې نن سهار د سپین بولدک ولسوالۍ اړوند ښورواک سیمه کې د سړک غاړې ماین د چاودنې له امله د محمد اکبر په نوم د طالبانو د البدر قول اردو د سرحدي لېوا قومندان وژل شوی او ۲ ساتونکي يې ټپيان دي.
د دې پېښې مسووليت چا پر غاړه نه دی اخیستی.
په کندهار کې د ورته ډېرو پېښو مسووليت د افغانستان د ازادۍ جبهه پر غاړه اخلي.
يادې جبهې نن د ميدان وردګو ولايت د چک ولسوالۍ لپاره د طالبانو د مرستيال ولسوال مولوي محمد عمر د وژلو خبر ورکړی.
سرچينه ادعا کوي، چې په دې کمین کې يې د دغه طالب چارواکي ۴ ساتونکي هم وژلي او وسلې يې ترې وړي دي.
طالبانو د دې پېښو په اړه څه نه دي ويلي.
نن د افغانستان په څه باندې پینځو نورو ولايتونو کې هم د چاودنو او پکې ګڼو کسانو ته د مرګ ژوبلې خبر ورکړل شوی دی.