تاند(پنجشنبه، د جوزا ۱۲ مه) د پاکستاني طالبانو تحر یک (ټي ټي پي) وايي چې له دوو ورځو راهیسې په کابل کې له دوی سره د قبایلي مشرانو او دیني عالمانو په ګډون د پاکستان د حکومت له لوري د ورلېږل شوې جرګې خبرې دوام لري.
د پاکستاني طالبانو د تحریک ویندوی محمد خراساني په یوه اعلامیه کې ویلي چې په دې دوه ورځنیو خبرو کې د پام وړ پرمختګ شوی او په نتیجه کې د (ټي ټي پي) مشرتابه پرېکړه کړې چې تر بلې خبرتیا پورې اوربند وغځوي.
په اعلامیه کې همداراز راغلي چې د خبرو اترو د پروسې د وړاندې بیولو لپاره به په راتلونکو څو ورځو کې نورې ناستې وشي.
دا خبرې د افغان طالبانو، په تېره بیا د حقاني شبکې په اصرار ترسره کېږي.
یو شمېر افغانانو پر طالبانو له دې کبله انتقادونه کړي چې پاکستاني طالبان مجبوروي چې د شریعت د نفاذ له غوښتنې تېر شي او د پاکستان له سیکولر او دیموکرات جمهوري حکومت سره خبرو ته کښېني خو له خپل جمهوري حکومت سره یې، چې ټول قوانین یې د اسلام پر اصولو متکي وو، د جهاد په نوم جګړه کوله.
د پاکستان د حکومت او پاکستاني طالبانو ترمنځ د افغان طالبانو په منځګوتوب وروستۍ خبرې تر اختر وړاندې پیل شوي دي. دوی تر دې وړاندې هم د خبرو لپاره اوربند کړی و خو وروسته یې پای ته ورساوه.
پاکستان له طالبانو غواړي چې د دغه هیواد اساسي قانون ومني، وسله پر مځکه کښېږدي او خپلو کورونو ته ستانه شي.
خو طالبان وايي، له خیبرپښتونخوا ایالت سره د قبایلي سیمو د یوځای کېدو پرېکړه دې بېرته واخیستل شي، په قبایلي سیمو کې دې شریعیت نافذ شي، له بنده دې ټول پاکستاني طالبان خلاص شي او پوځ دې له قبایلي سیمو ووځي.