تاند(شنبه، د جوزا ۷ مه) په غور کې د طالبانو ځايي چارواکو د دولتي بنسټونو د کارکوونکو د مياشتيني معاش يو فيصد جبرآ د مدرسو د لګښتونو په نوم ورڅخه ټول کړی دی.
ځايي چارواکو بيا د دې موضوع د تاييد ترڅنګ په دې کار کې اجبار رد کړی او ویلي، چې کارکوونکو په خپله خوښه مدرسو ته د خپلو معاشونو فيصدي ورکړې ده.
په غور کې د طالبانو د والي وياند عبدالواحد حماس ويلي، چې د يو فيصد معاش د ټولولو پريکړه د دې ولايت په اداري غونډه کې شوې ده.
غور د افغانستان له ډېرو محرومو ولايتونو څخه دی، چې خلک يې له ډېرو اقتصادي ستونزو شکايتونه لري.
طالبانو له ټول اقتصادي ناورين سره د هېواد په هره ولسوالۍ کې د نوو مدرسو د جوړولو پریکړه کړې ده.
تر اوسه د دغو مدرسو د مالي سرچينو په اړه څه نه دي ويل شوي.
خلک تشویش لري، چې د نوو مدرسو لګښتونه طالبان پر دوی جیري نه کړي.