تاند(چار شنبه، د جوزا ۴ مه) د طالبانو د ریاست الوزرا اقتصادي مرستیال ملا عبدالغني برادر آخند نن پنجشېر ولایت ته سفر وکړ.
د طالبانو په يوه لنډه اعلامیه کې راغلي، چې نوموړي هلته یې له ځایي مجاهدینو او مسؤلینو سره لیدلي او « لازمې سپارښتنې» يې ورته کړي دي.
د طالبانو وياندويانو په دې اړه نور جزییات نه دي ورکړي.
څه موده مخکې د طالبانو د دفاع وزیر ملا یعقوب مجاهد هم، چې ملا برادر سره د پنجشېر په جګړو کې همغږی ښکاري، پنجشېر ولايت ته سفر کړی و.
طالبان په پنجشير کې د جګړې او خپلو مخالفو ځواکونو موجودیت ردوي، خو د احمد مسعود په مشرۍ د طالبانو خلاف د مقاومت د يوې ډلې مشر هلته د طالبانو پر وړاندې د جګړې او لاسته راوړنو ادعاوې کوي.