تاند(چارشنبه، د جوزا ۴ مه) د طالبانو د کورنيو چارو وزارت چارواکو د کابل ښار د ترافیکو څلور لاري په یوه جومات کې د نن ماښام د چاودنې د مرګ ژوبلې په اړه تازه معلومات خپاره کړل.
د دغه وزارت په يوه اعلاميه کې راغلي:(( ورستي جزییات دادي، چې زموږ ۱۸ تنه هیوادوال زخمیان او ۶ نور شهیدان شوي.))
د طالبانو دغه اعلاميه زياتوي، چې یاده پېښه په کلکو ټکو غندي او امنیتي ځواکونه يې هڅه کوي څو عاملین یې پیدا او د قانون منګولو ته وسپاري.
د دغې چاودنې مسووليت چا پر غاړه نه دی اخیستی.
نن ناوخته د مزارشريف ښار په درېيو چاودنو کې هم طالبانو د ۹ ملکیانو وژل کیدل او د ۱۵ نورو ټپي کیدل تایید کړي دي.
د يادو پېښو څرنګوالی او نور جزییات نه دي په ډاګه شوي.
په وروستيو کې ورته پېښې زياتې شوي، خو طالبان يې نه تاييدوي او د بشپړ امنيت د ټينګښت خبره کوي.