تاند(سې شنبه، د ثور ۲۷ مه) د طالبانو د کورنيو چارو وزير او د حقاني شبکې مشر سراج الدين حقاني وايي، چې طالبان له امریکا سره دښمني نه لري او هڅه کوي د ديپلوماسۍ له لارې خپلې ستونزې ورسره حل کړي.
نوموړي له سي این این ټلویزون سره په يوه تازه مرکه کې وویل، چې طالبان امريکا متحده ايالات د ځان دښمن نه ګڼي.
نوموړي په دې مرکه کې ویلي، چې د ديپلوماسۍ له لارې امريکا سره د ستونزو حل غواړي او په دې برخه کې په ځلونو ځلونو هڅې هم شوي دي.
امريکا متحده ايالاتو د سراج الدين حقاني په اړه د معلوماتو د ورکولو یا نيولو په سر له څو کلونو راهيسې۱۰ ميليونه امريکايي ډالره جايزه ټاکلې وه.
د طالبانو د حقاني شبکې مشر په دې مرکه کې د نجونو د تړل شويو ښوونځيو په اړه ويلي، چې دوی د نجونو د زده کړو مخالف نه دي او د بيرته پرانيستلو په میکانیزم یې کار روان دی.
د طالبانو منتقدین بيا دوی په دې اړه په دروغ ویلو تورنوي او وايي، چې دوی په ۹ مياشتينۍ واکمنۍ کې یې ريښتيا هم د یوه میکانیزم د جوړولو وړتیا نه لري؟
د طالبانو دغه لوړ پوړي چارواکي دا څرګندونې په داسې حال کې کړي، چې امريکا د ښځو د حجاب په نوم د طالبانو د نویو قیوداتو په غبرګون کې پر دوی د نورو بندیزونو خبرداری ورکړ.
د طالبانو او امريکا متحده ايالاتو اړيکې د ځینو شنونکو له نظره مرموزې او شکمنې دي.
طالبان بيا ردوي، چې ګواکې د پردې شاته یې په قطر کې له امریکا سره د سولې پر تړون سربېره نورې معاملې کړي دي.