تاند(سې شنبه، د ثور ۲۷ مه) د پاکستان حکومت د ګوښه شوي صدراعظم عمران خان د هغو ادعاوو په غبرګون کې چې وايي د وژلو هڅې یې روانې دي، نوموړي ته د اضافي ساتونکو د ورکولو خبر ورکړی.
عمران خان څو ورځې مخکې په فيصل اباد ښار کې د يوې وينا پر مهال ادعا وکړه، چې د وژلو هڅه يې روانه ده.
هغه د خپلې دغې ادعا په اړه نور جزییات نه دي ورکړي او نه ده معلومه، چې خان کوم لوري د ده د وژلو په هڅو تورنوي.
عمران خان له خپلو پلویانو غوښتي، چې که دی ووژل شو، د وژل کيدو قضیه یې تعقيب کړي.
د پاکستان حکومت بيا ويلي، چې د کورنیو چارو، دفاع وزارتونو او استخباراتو ادارې اړوند نوي ځواکونه یې د عمران خان د کور او غونډو د امنيت لپاره ګومارلي دي.
عمران خان تېره میاشت د پارلمان له لوري بې باوره او له واکه ګوښه شو، خو هغه پړه پر امريکا اچولې او ويلي، چې دغه هېواد ته یې نه تابع کیدل د نوموړي خلاف د مخالفو سیاسي ډلو د پاڅیدو سبب شو.
د پاکستان د چارو شنونکي بيا باور لري، چې نوموړی د دغه هېواد د پوځ له لوري ګوښه او ځپل شوی، یا لوبه همداسې ده چې عمران خان به د امریکا د مخالفت له اکټونو سره د پاکستان اوسنی حکومت له امریکا څخه ډېر امتياز اخیستو ته چمتو کوي.
د پاکستان يوه بله پخوانۍ صدراعظمه بينظير بوټو په ۲۰۰۹ کې ووژل شوه، چې پوځ یې پړه د پاکستان په تحريک طالبان واچوله، خو شنونکي باور لري چې د هغې د وژنې تر شا د پوځ لاس و.
د عمران خان په اړه هم يو تحليل دا دی، چې که د پوځ په همغږۍ روان نه وي او ريښتیا مخالفت ورسره لري، د وژلو پلان به يې حقیقت نه لیرې او نیمګړی نه وي.