تاند(سې شنبه، د ثور ۲۷ مه) د ګرمۍ د موسم له شدت سره کابل ښاریان د برېښنا له کمښت او پرچاوۍ څخه شکایت لري.
دغه ښاريان د طالبانو په حکومت نيوکه کوي، چې په سالنګ کې د وارداتي برېښنا د پایو له الوزول کېدو وروسته یې د برېښنا په نورماله کيدو کې اقدام نه دی کړی.
د بریښنا د پایو د الوزول کیدو نيږدې دوه اونۍ شوي، خو کابل ښاریان وایي چې بريښنا يې تر اوسه هم ګډوډۍ لري او ګڼو ستونزو سره مخ شوي دي.
د ښاریانو په وينا، د بریښنا کمښت او نادرکۍ په کابل کې چې د ژوند ډېرې اړتياوې پکې بريښنا سره تړلي دي، د دوی ورځینی ژوند په دې سخته ګرمۍ کې اغېزمن کړی دی.
د طالبانو چارواکو په سالنګ کې د بریښنا د الوزول شویو پايو د ژر رغولو ژمنه کړې وه.
د دغو پايو له الوزولو سره د کابل په ګډون د افغانستان ۱۰ ښارونه د بریښنا د کمښت او نشتوالي له ستونزې سره مخامخ دي.
په دې اړه د بریښنا شرکت له وياند مولوي حکمت الله میوندي سره د خبرو هڅه وشوه، خو په خبرو بریالي نه شوو.
د بریښنا په اړه ورته ستونزه په افغانستان کې پخوانۍ ده او د پرزول شوي جمهوري نظام په وخت کې هم ډېره رامنځته کیده.
هغه وخت طالبان تر ډېره د دې ستونزې په رامنځته کولو تورنیدل.