تاند:( شنبه، د ثور څلور ویشتمه) د افغانستان بې واکه شوي ولسمشر محمد اشرف غني د خپل کوربه هېواد متحده عربي اماراتو د دولت د رييس شیخ خلیفه بن زاید النهیان په مړينه خواشيني ښودلې ده.
ښاغلي غني په يوه پيغام کې ويلي، چې نوموړي د خپل هېواد په بدلون کې ځانګړی رول درلود او ورسره یې په ټوله نړۍ کې د اسلامي فرهنګ او تمدن لپاره هڅې د درناوي وړ دي.
بې واکه شوي ولسمشر زياته کړې، چې د افغانستان د خلکو ژوره غمرازي د نوموړي په مړينه د ياد شوي هېواد خلکو او چارواکو ته وړاندې کوي.
شیخ خلیفه بن زاید النهیان پرون (جمعه) د ۷۳ کلونو په عمر وفات شو.
د متحده عربي اماراتو د رسمي خبري اژانس وام د راپور له مخې، نوموړی د دغه هیواد دوهم ريیس یا دولتمشر و.
د دولتمشرۍ د وزارت پر اساس، سر له جمعې څخه به په متحده عربي اماراتو کې د ۴۰ ورځو لپاره د ویر په توګه د دغه هیواد بیرغ نیم ځوړند وي.
د شیخ خلیفه بن زاید النهیان د مړینې په خاطر به د وزارتونو په شمول ټولې دولتي ادارې، سیمه ییزې ادارې، موسسې او همداراز سوداګري سیکتور د درو ورځو په مخه بند وي.
معلومه نه ده، چې په متحده عربي اماراتو کې مېشت جلا وطنه بې واکه شوی افغان ولسمشر به د کوربه هېواد د وفات شوي دولت مشر د مړينې په مراسمو کې ګډون وکړي کنه؟