تاند:( چار شنبه، د ثور يو ويشتمه) د طالبانو د مخابراتو او معلوماتي ټکنالوژۍ وزارت وايي، چې د قرغیزستان د سیمه ییز پراختيايي وجهي صندوق له رهبرۍ پلاوي سره يې غونډه کړې.
د وزارت په يوه اعلاميه کې راغلي، چې په دې غونډه کې ياد شوي شرکت په افغانستان کې پر با کیفیته او ارزانه انټرنېټ د پانګونې په اړه طالب چارواکو سره خبرې کړي دي.
د طالبانو د مخابراتو او معلوماتي ټکنالوژۍ وزير مولوي نجیب الله حقاني په دې ناسته کې د قرغیزستان د ياد شوي شرکت پلاوي ته په یاده پانګونه کې د هر اړخیزې همکارۍ ډاډ ورکړی.
دا په داسې حال کې ده، چې په افغانستان کې د انټرنیټي خدمتونو له پیله تراوسه خلک هم د دغو خدمتونو له کیفیت او هم قیمت څخه شکایت کوي.
د طالبانو له اوسنۍ واکمنۍ سره سم، د دوی چارواکو ژمنه کړې وه، چې په دې برخه کې به اړوند شرکتونه د عدالت تامینولو ته مجبوروی، خو ليدل کيږي چې په عمل کې یې څه نه دي کړي.