تاند:( یکشنبه، د ثور اتلسمه) د افغانستان له پاره د اروپايي ټولنې ځانګړي استازي، توماس نيکلاسن، نن په کابل کې د طالبانو د بهرنيو چارو له سرپرست وزير، مولوي اميرخان متقي سره ليدلي.
د طالبانو د بهرنيو چارو وزارت په يوه اعلاميه کې راغلي:« په دې کتنه کې ښاغلي نيکلاسن د اقتصادي وضعيت د پياوړتيا، ښوونې او روزنې، خلکو ته د کار د خوندي فُرصتونو برابرولو په اړه د هڅو د دوام او امنيتي مسايلو په اړه خپل نظريات شريک کړل.»
د سرچينې د معلوماتو له مخې، نوموړي ټينګار وکړ چې د ټولو ستونزو د هواري يوازېنۍ لاره د “خبرو اترو په ادامې” کې نغښتې ده.
په همدې حال کې طالبانو د بهرنيو چارو سرپرست وزير پر دې ټينګار وکړ چې د افغانستان له خاورې به هيچا ته ګواښ نه پيښيږي.
د طالبانو اعلاميه زياتوي:« نوموړي همدا رنګه د سرتاسري امنيت، د خلکو د ژوند د ښه کولو له پاره د پرېکنده هوډ د موجوديت او نورو پام وړ موضوعاتو په اړه مفصلې خبرې وکړې.»
سرچينه وايي، په کتنه کې دواړو لوريو د افغانستان او اروپايي ټولنې تر منځ د داسې همکاريو پر پياوړتيا ټينګار وکړ چې د خلکو د ژوند د ښه والي لامل شي.
د طالبانو د بهرنيو چارو د وزير دا څرګندونې په داسې حال کې دي، چې له افغانستان څخه د فقر، بې کارۍ او نهیلۍ د شدت له کبله په پراخه کچه د هېواد پريښودو لړۍ روانه ده.
په وروستيو کې د افغانستان له خاورې مختلف سیمه ییز هېوادونه د بریدونو هدف هم ګرځیدلي، چې مسووليت يې داعش ډلې پر غاړه اخيستی دی.