تاند:( یکشنبه، د ثور اتلسمه) داعش ډلې ويلي، چې د تخار ولايت له خواجه غار ولسوالۍ څخه پر تاجيکستان هېواد ترسره شوي ۴ توغنیز بریدونه د دوی له لوري تر سره شوي دي.
د تاجيکستان ځینو رسنیو پرون د يادو بریدونو د ترسره کيدو خبر ورکړ.
تاجيکستاني رسنيو ويلي، چې له توغنیزو بریدونو څخه وروسته د دوی سرحدي ځواکونو هم د افغانستان پر لور ډزې کړي، خو ځاني تلفات نه لري.
يادو رسنيو د ځینو طالب سرچینو په حواله ویلي، چې دغه بریدونه د داعش ډلې له لوري شوي.
خو تاجيکستاني رسنيو د خپلو ځینو چارواکو په حواله، د بریدونو مسوولیت د تاجيکستان پر انصار الله ډلې اچولی دی.
اوس داعش ډلې په خپله یوه اعلامیه کې منلې، چې دا توغندیز بریدونه دوی کړي دي.
د افغانستان طالب چارواکو په رسمي ډول په دې اړه څه نه دي ويلي.
داعش ډلې څه موده مخکې، د افغانستان له بلخ ولايت څخه پر ازبکستان هېواد هم د بریدونو ادعا کړې وه، چې طالبانو او ازبکستاني چارواکو رد کړې وه.