تاند:( سې شنبه، د ثور دیارلسمه) د طالبانو د رژيم ویاند او د دوی د اطلاعاتو او فرهنګ وزارت نشراتي معين ذبیح الله مجاهد د مطبوعاتو د ازادۍ د نړیوالې ورځې په مناسبت خپرو شويو راپورونو ته غبرګون ښودلی.
نوموړي ویلي، چې د طالبانو رژيم د رسنیو تر شا ولاړ دی او حمایت یې کوي.
د مجاهد په وينا، په افغانستان کې رسنۍ د قوانینو په دننه کې آزاد فعالیت او نشرات کولای شي.
طالب وياند زياتوي:« هغه رسنۍ چې د امریکايي ځواکونو له وتلو وروسته یې فعالیت دریدلی عامل یې د طالبانو اسلامي امارت نه، بلکې د تمویل له لاسه ورکول دي چې د بهرنیو ځواکونو او سفارتونو لخوا د خپلو موخو لپاره تمویلیدې.»
د طالبانو د اطلاعاتو او فرهنګ وزارت دغه مقام وايي، رسنیو ته ډاډ ورکوي چې د مالي ستونزو په حل کولو کې به ورسره تر وسه وسه همکاري کوي.
ذبیح الله مجاهد همدا شان ادعا کوي، چې اوس مهال طالبان په خپلو زندانونو کې هیڅ کوم بندي خبریال نه لري.
د ده په وينا، کله که کوم خبریال دپوهاوي او وضاحت لپاره ځینو اداروته رابلل کیږي دا کلکه هم دشکنجې او زنداني کیدو په معنا نده.
د طالبانو د رژيم وياند زياتوي:« په دې اړه د ځینو خواوو اندیښنه پرځای نه ده.»
د مۍ درېيمه ( د مطبوعاتو د ازادۍ نړیواله ورځ) نن په داسې حال کې نمانځل کېږي، چې د بې پولې خبريالانو ټولنې په دې برخه کې د افغانستان وضعیت د اندیښنې وړ ګڼلی او ويلي، چې دغه هېواد د طالبانو له واکمنیدو سره له خپله ځایه ۳۴ درجې شاتګ کړی دی.
یادې ټولنې مخکې د نړۍ د هېوادونو په ډله کې د افغانستان مقام یوسلو دوه ويشتم ښودلی و.
بې پولې خبريالانو ویلي، چې اوس د افغانستان مقام د مطبوعاتو د آزادۍ له پلوه د نړۍ د یوسلو اتیا هېوادونو ترمنځ یوسلو شپږ پنځوسم مقام ته راغلی، چې ۳۴ درجې شاتګ ښیي.
د بې پولې خبريالانو په یوه اعلامیه کې راغلي، چې د افغانستان د خبریالانو او رسنیو وضعیت د سختې اندیښنې وړ دی.
په دې نړيواله ډلبندۍ کې ناروې، ډنمارک او سویډن د مطبوعاتو د ازادۍ په لحاظ تر ټولو ښه او ايران، اریترا او شمالي کوریا په تر ټولو بد وضعیت کې دي.
د بښنې نړیوال سازمان هم نن د افغانستان د رسنيو ازادي، په خاص ډول د ښځینه خبریالانو امنیت او وضعیت د سختې اندیښنې وړ ګڼلی.