تاند:( جمعه، د ثور نهمه) خبري سرچينو افشا کړې، چې د پاکستان یو شمېر پوځي چارواکي پرون کندهار ولايت ته راغلي او د بندو دروازو شاته یې ځايي طالب مسوولانو سره لیدلي.
د دغو لیدنو موخه روښانه نه ده او طالب چارواکو يې جزییات نه دي رسنيز کړي.
تر دې مخکې ویل شوي و، چې په کندهار کې د طالبانو والي محمدیوسف وفا د پاکستان د آیاېسآی ځينو مسوولانو سره لیدلي؛ خو وروسته ځايي طالب چارواکو دا خبرې رد کړې.
له دې سره هم مهاله، د طالبانو د واکمنۍ وياند ذبيح الله مجاهد نن د دوی د لوی مشر ملا هیبت الله اخوند زاده په نوم د اختر مبارکۍ پيغام خپور کړی، چې د اردو ژبې متن يې هم درلود.
د کابل پوهنتون پخواني استاد محبوب شاه محبوب په خپله ټويټر پاڼه کې د ذبيح الله مجاهد له مخاطب کولو سره ليکلي:« اردو د کومې اړتیا له مخې ستاسو د بیانیې ژبه ده؟
نه د افغانستان ملي او رسمي ژبه ده،نه کوم نړۍوال حیثیت لري او نه هم اردو ژبي افغانان شته، کومه اړتیا او کوم مجبوریت؟
که افغانان پوهول غواړئ.اردو یوازې د پنجابي بادار ژبه ده.»
د طالبانو وياندويانو په دې اړه رسنيو ته څه نه دي ويلي، خو تر دې مخکې یې د پاکستان د لاسپوڅي توب په اړه تورونه په کلکه رد کړي دي.