تاند(شنبه، د ثور ۳ مه) د هند په غوره لیګ سیالیو کې د راشد خان ټیم، ګوجرات ټایټانس د کلکتې نایټس رایډرز لوبډلې ته په اتو منډو ماتې ورکړه.
په دې سیالۍ کې ګوجرات ټایټنس، چې پچه یې ګټلې وه، لوږمړی بیټنګ وکړ او سیالې لوبډلې ته ۱۵۷ منډې هدف وټاکه.
د کلکتې نایټ رایډرز لوبډلې د اتو لوبغاړو له سوځېدو وروسته ۱۴۸ منډې وکړای شوې.
راشد خان د دې مسابقې غوره لوبغاړی ونومول شو. ده په ۴ اورونو کې ۲ لوبغاړي وسوځول او ۲۲ منډې یې ورکړې.
دې بري د ګوجرات ټایټنس لوبډله د آی بي ایل یا د هند د غوره لیګ د جدول په سر کې پرېښوده. دې لوبډلې تراوسه ۷ مسابقې کړي، ۶ یې ګټلي او یوه یې بایللې ده. ورپسې د حیدراباد سن رایزر لوبډله ده چې په اوو سیالیو کې یې ۵ ګټلي دي.