تاند:( شنبه، د ثور درېیمه) د طالبانو د بهرنیو چارو وزیر مولوي امیرخان متقي د قطر په پلازمېنه دوحه کې د افغانستان لپاره د بریتانیې سفیر هيوګو شارتر سره لیدلي.
د متقي وياند وايي، چې د بریتانیې سفیر په افغانستان کې وروستۍ پیښې چې ولسي خلګ په کې په نښه شوي دي وغندل او غم شریکي یې څرګنده کړه.
طالب ویاند زیاتوي:« نوموړي وویل چې د هیواد پالیسې یې داده چې د نوي افغان حکومت په خلاف د وسلوال مخالفت ملاتړ نکوي او نه هم دا ډول اقدامات ګټور بولي.»
د سرچينې د معلوماتو په اساس، شارتر د مخدره موادو د بندېدو د فرمان هرکلی وکړ او یادونه یې وکړه چې له نړیوال بانګ سره په یوه ګډه طرحه کار کوو تر څو افغان کروندګرو ته د بدیل معیشت په رامنځته کولو کې همکاري وکړو.
د طالبانو د بهرنيو چارو وزير مولوي متقي په حواله ویل شوي، چې په دې لیدنه کې یې له بریتانیا سره پر مثبتو اړیکو ټینګار وکړ او د طالبانو د مخالفو ډلو وروستۍ هڅې چې ملکي اهداف په نښه کوي، د هغوی د ضعف او له هیواد والو سره د دښمنۍ نښه وبلله.
دا لیدنه په داسې حال کې شوې، چې په وروستيو کې ځينو رسنيو د جنبش ګوند مشر عبدالرشيد دوستم سره د بریتانیا د ۲۵۰ میلیونه پونډو مرستې خبر ورکړل شوی.
ویل شوي، چې دا پیسې په شمال کې د داعش ډلې او جګړې د پیاوړتیا لپاره ورکړل شوي، خو دوستم ته نيږدې سرچينو دا خبره بې بنسټه بللې ده.