تاند:(پنجشنبه، د ثور لومړۍ) د ایران استخباراتي شبکې او سپاه پاسداران ته نيږدې رسنۍ « تسنیم» په يوه تبصره کې د افغانستان د ازبکانو مشهور مشر عبدالرشيد دوستم د داعش ډلې په نوم د پروژې په مخته وړلو تورن کړی.
تسنیم اژانس ویلي، چې د جمهوري نظام په یوه ولسمشریزه دوره کې د ولسمشر لومړی مرستیال او د ملي جنبش ګوند مشر عبدالرشيد دوستم په افغانستان کې د داعش پروژه پر مخ بیايي او په دې خاطر ۲۵۰ میلیون ډالره هم ورکړل شوي دي.
یوې اسراییلي ورځپاڼې هم د تسنیم همدې راپور ته په اشارې لیکلي چې ایران په افغانستان کې د داعش له قوت اخیستو او ایران ته د ناامنۍ د غځېدو له کبله اندېښمن دی.
سرچينې په دې اړه نور جزییات نه دي وړاندې کړي.
څه موده مخکې د دوستم د ګاردانو پخوانی مشر رييس هاشم چې وروسته د جوزجان والي هم ټاکل شوی و، په ایران کې ونیول شو.
رييس هاشم په دې تورن شوی و چې د امريکا په پلوۍ د اوکراین جګړې ته له ایران څخه بېوزله افغان کډوال جذبوي.
د ايراني چارواکو په نوم د دوستم په يوه رسنيز شوي غږيز کليپ کې بيا رييس هاشم بې ګناه ګڼل شوی او په خوشې کیدو کې يې د مرستې غوښتنه شوې ده.
اوس د دوستم په اړه د ايران د سپاه پاسداران د اړوندې رسنۍ له تازه ادعا څخه ښکاري، چې ايران د دوستم د ګاردانو مشر اصلا د داعش ډلې د ملاتړ په دليل نيولی دی.
د افغانستان د پرزول شوي جمهوري نظام یوې استخباراتي سرچینې تاند ته وويل چې د نورو هېوادونو تر څنګ د ترکیې په اده داسې اسناد او شواهد موجود وو، چې د خپلو ستراتیژیکو هدفونو لپاره یې په افغانستان کې د داعش ډله حمایه کوي.
د سرچينې د معلوماتو په اساس، ترکېې په دې ترڅ کې افغانستان ته د دیپورټ شویو ناقانونه کډوالو په ډله کې یو شمېر بهرني داعشیان هم ليږل.
ګومان کېږي چې دوستم به د داعش د ملاتړ لپاره خپلې هڅې د ترکیې او داعش د نړيوالو متحدانو په لارښوونه او تمويل مخته وړي.
د داعش ډلې په اړه يو شمېر شنونکي باور لري چې که اصلي پيلونکي يې هر څوک وي، حو اوس زیاتو هیوادونو په دې نوم د خپلو نيابتي ډلو د جوړولو هڅې چټکې کړي، څو خپلې ځينې ګټې ورباندې تر لاسه او مخالفان يې په لاس وټکوي.
په وروستيو کې د طالبانو يو شمېر مهم ازبک قومندانان د دوی له لیکو جلا او ګومان کیږي چې داعش ډلې ته ورځي.
د دغو قوماندانانو په نوم د دوستم ځينې غږیز کليپونه هم رسنيز شوي، چې د طالبانو مخالفت او په دې صورت کې د ده له ملاتړه د برځمن کيدو ډاډ پکې ورکړل شوی دی.
دوستم ته نژدې کسانو په دې اړه څه نه دي ويلي، خو طالبان خپلمنځي اختلافات او د پاشتليا امکان ردوي.
څو ورځې مخکې د افغانستان له حيرتان بندر څخه داعش ډلې پر ازبکستان د توغندیو د برید ادعا وکړه، چې د افغانستان د طالبو چارواکو تر څنګ ازبکستان هم دا ادعا رد کړه.