تاند(پنجشنبه، د حمل ۳۱ مه) وروسته له دې چې ادعا وشوه چې ګنې داعش ډلې د افغانستان له خاورې پر ازبکستان راکټي برید کړی، د افغانستان حیرتان بندر ته نژدې د لسګونو ازبکستاني الوتکو د مانورې ویدیو خپره شوه.
په دې ویدیو کې لسګوته جنګي الوتکې او هیلي کوپترې لیدل کېږي چې د افغانستان د حیرتان بندر د چشمه په نوم ساحې په اسمان کې الوځي.
تر دې مخکې د داعش خراسان څانګې ادعا کړې وه چې د دوشنبې په ورځ (د اپریل ۱۸ مه) یې د افغانستان له خاورې د ازبکستان پر ترمذ سرحدي ښار راکټونه ویشتي دي. دې ډلې یوه ویډیو خپره کړه چې په هغې کې توعندي د ویشتلو په حال کې ښکاري. خو د ازبکستان چارواکو دا ادعا په کلکه رد کړه.
په همدې حال کې د ازبکستان د ولسمشر ویندوی په یوه پوسټ کې، چې په ټیلګرام کې یې خپور کړی دی، ویلي چې د دغه هیواد او افغانستان د پولې په اوږدو کې د هیڅ راز پوځي فعالیت څرګ نه دی لګېدلی او په وضعیت بشپړ تر کنټرول لاندې دی.
طالبان وايي چې د داعش ډله یې ځپلې ده خو دې ډلې له یوې وقفې وروسته په وروستیو کې په افغانستان او پاکستان کې د یو شمېر خونړیو بریدونو مسوولیت په غاړه اخیستی دی.
روانه اوونۍ د کابل په لوېدیځ کې چاودنو لږترلږه ۶ زده کوونکي ووژل.