تاند:( دوشنبه، د حمل ۳۰ مه) د افغانستان د شیعه علماوو شورا نن په یوه اعلامیه کې د جګړې هڅولو د هڅو مخالفت وکړ.
دغې شورا په یوه اعلامیه کې نن وویل، چې د هرې جګړې پیل او دوام په هېواد کې د مېشتو خلکو په خير نه دی.
یادې شورا پر ټولو افغانانو، په خاص ډول شیعه ګانو غږ وکړ، چې په حقیقي او مجازي فضا دواړو کې د جګړې غوښتلو له شعارونو سره ملګري نه شي.
د شیعه علماوو شورا په دې اعلاميه کې دغه راز له رسنيو غوښتي، چې د جګړې د مخنيوي لپاره پیغامونه خپاره او د بدو پېښو مخه ونيسي.
د شیعه علماوو شورا په دې اعلاميه کې همدا شان، له ایران او پاکستان سره د اړیکو ترینګلتیا کې په يو ډول د دغو هېوادونو څنګ نیولی او له طالب چارواکو یې غوښتي څو له دغو هېوادونو سره د اړيکو ښه کیدو ته هڅې وکړي.
د دې شورا په اعلامیه کې له ګاونډيو هېوادونو سره ترينګلې اړيکې هېواد ته « خطرناکې» ګڼل شوي.
دغه راز په طالبانو غږ شوی، چې په عملي ډول د ټول ګډونه حکومت د جوړیدو لپاره هڅې وکړي.
په وروستيو کې د طالبانو خلاف د جګړې هڅې او عملي ګامونه په زیاتیدو ښکاري.
د هزاره ګانو ځينې مشران له دې کبله، چې په لومړي ځل په کابل ښار کې په رڼا ورځ ۴ طالبان د کابل په لویدیزه او هزاره مېشته سيمه کې ۴ طالبان ووژل شول، په تبلیغیدونکې جګړه کې د دوی د قرباني کيدو نه وېرېږي.
څو ورځې مخکې د طالبانو په حکومت کې د اقتصاد وزارت مرستيال او تر ټولو لوړپوړي هزاره طالب مقام عبدالطيف نظري د طالبانو خلاف جنګي ډلو ته خبرداری ورکړ، چې د ده په وينا په هزاره ګانو کې ځای نه لري.