تاند:( دوشنبه، د حمل ۳۰ مه) سره له دې، چې د طالبانو امنيتي چارواکو په کابل کې د نننیو چاودنو د وژل شويو شمېر ۶ تنه ښودلی، خو په جناح او ايمرجنسي روغتونونو کې سرچينو د دې چاودنو له کبله يوازې دوی ته د ۲۲ وژل شویو کسانو د جسدونو او ټپیانو د وړلو خبر ورکړی.
په دې کسانو کې د وژل شويو او ټپي شویو شمېر او شهرت په کره توګه نه دی په ډاګه شوی.
د ايمرجنسي روغتون سرچینو ویلي، چې په قربانیانو کې له ۱۶ څخه تر ۱۹ کلونو پورې عمر لرونکي کسان هم شامل دي.
د طالبانو له لوري په کابل امنیه قومندانۍ کې ټاکل شوي ویاند خالد ځدراڼ په نننيو چاودنو کې د ۶ تنو وژل کيدل او د ۱۱ تنو ټپي کیدل تایید کړي دي.
د راپورونو له مخې، يوه چاودنه د دشت برچي سيمې په ممتاز تعليمي مرکز او عبدالرحيم شهید لېسه کې شوي دي.
نن په کابل کې د ایران يوه پخواني سفير طالبان د افغان اهل تشيعو په امنیت ساتلو کې په پاتې راتلو او بې مسوولیتۍ تورن کړل.