تاند:( دوشنبه، د حمل ۲۹ مه) د افغانستان پر مختلفو ولايتونو د پاکستان له هوايي بمبارۍ څخه څو ورځې وروسته د طالبانو یو شمېر چارواکو د دغو بمباریو د تلفاتو ارقام په ډاګه کړل.
په خوست کې د طالبانو د اطلاعاتو او فرهنګ رييس شبیر احمد عثماني د فرانسې خبري اژانس ته ويلي چې پر خوست د پاکستاني الوتکو د بمبارۍ له کبله ۴۱ تنه وژل شوي او ۲۲ نور ټپيان دي. مخکې په راپورونو کې د خوست د تلفاتو شمېر ۴۷ تنه ښودل شوی و.
هغه د دې بمبارۍ ډېر وژل شوي او ټپيان ښځې او ماشومان وبلل.
د طالبانو د امر بالمعروف وزارت يوه چارواکي نجیب الله ببا په خوست کې د وژل شويو کسانو شمېر ۴۸ تنه ښودلی دی.
د هغه په وينا، په دې کسانو کې ۲۲ تنه يې يوازې د يوې کورنۍ غړي دي.
د جمشېد په نوم يوه قومي مشر هم منلې چې تر ۴۰ پورې وزیرستاني کډوال د پاکستاني بمبارۍ په نتیجه کې په خوست ولايت کې وژل شوي دي.
په کونړ کې د پاکستاني بمبارۍ په اړه تازه جزییات نه دي ورکړل شوي، خو مخکې ځايي خلکو هلته د يوې کورنۍ د ۵- ۶ غړو د وژل کيدو خبر ورکړی او ویلي وو چې په دغو کسانو کې څو ماشومان او ښځې شاملې دي.
د دې بمباریو خلاف د افغانستان په مختلفو سيمو او د پاکستان تر کنټرول لاندې ښارونو کې لاریونونه شوي.
نن په نيمروز کې پاکستاني ځواکونو پر افغان لاریون کوونکو هم ډزې کړي، چې د ۸ تنو د ټپي کیدو راپور یې تر لاسه شوی.