تاند:( شنبه، د حمل ۲۷ مه) د افغانستان پخواني ولسمشر حامد کرزی پر خوست او کونړ ولایتونو د پاکستاني پوځیانو هوایي بمباري چې له امله یې د ښځو او ماشومانو په گډون لسګونه افغانان شهیدان او ټپیان شوي په کلکو ټکو غندلی.
د کرزي د دفتر په يوه اعلاميه کې ويلي:« حامد کرزی دغه بشري ضد جنایت د افغانستان د ملي حاکمیت نقض او د نړیوالو اصولو او موازینو خلاف عمل بولي.»
اعلاميه زياتوي:« کرزی د پاکستان پر حکومت ږغ کوي چې په سیمه کې د تروریزم د لمنځه وړلو لپاره، چې د افغانستان خلک یې له کلونو راهیسې قرباني دي، په خپلو پالیسیو او کړنو کې تغییر راوړي او له افغانستان سره د نېکې او متمدنې رابطې لار خپله کړي.»
د افغانستان په خوست او کونړ ولايتونو کې د پاکستاني ځواکونو د تیرې شپې د هوايي بريدونو له کبله د ګنو وزيرستاني کډوالو په ګډون د شاوخوا ۴۰ تنو د وژل کيدو خبر ورکړل شوی.
ويل شوي، چې په وژل شويو کسانو کې د څو ماشومانو په ګډون د کونړ د يوې کورنۍ څو غړي شامل دي.
پاکستاني چارواکو له دې پېښې وروسته په اسلام اباد کې د طالبانو د سفارت سرپرست هم احضار کړی او ادعا یې کړې، چې ګواکې د پاکستان پر پوځيانو په جنوبي وزیرستان کې وروستي بریدونه د پاکستان تحریک طالبان له افغانستان څخه تر سره کړي.
د طالبانو د بهرنيو چارو وزير مولوي امیر خان متقي بیا نن په کابل کې د پاکستان سفير منصور احمد خان د ياد شوي بمبارۍ له کبله ور غوښتی او د طالبانو د حکومت اعتراض یې ورسره شريک کړی دی.