تاند:( شنبه، د حمل ۲۷ مه) د پاکستان هوايي ځواک په افغانستان کې د خپلو هوايي بریدونو له تاييدولو سره په دې بريدونو کې د پاکستان د طالبانو تحريک د شاوخوا ۳۰ غړو د وژلو ادعا کړې ده.
دغه هوايي ځواک زياته کړې، چې په دې بریدونو کې له پینځه ویشتو څخه تر دېرشو پورې د پاکستاني طالبانو جنګيالي وژل شوي دي.
د پاکستان هوايي ځواک د دغو بریدونو سیمې کونړ، خوست او پکتيکا ولايتونه ښودلي دي.
نورو سرچينو ويلي، چې د پاکستاني ځواکونو د تیرې شپې د هوايي بريدونو له کبله د ګنو وزيرستاني کډوالو په ګډون د شاوخوا ۴۰ تنو د وژل کيدو خبر ورکړل شوی.
ويل شوي، چې په وژل شويو کسانو کې د څو ماشومانو په ګډون د کونړ د يوې کورنۍ څو غړي شامل دي.
پاکستاني چارواکو له دې پېښې وروسته په اسلام اباد کې د طالبانو د سفارت سرپرست هم احضار کړی او ادعا یې کړې، چې ګواکې د پاکستان پر پوځيانو په جنوبي وزیرستان کې وروستي بریدونه د پاکستان تحریک طالبان له افغانستان څخه تر سره کړي.
د طالبانو د بهرنيو چارو وزير مولوي امیر خان متقي بیا نن په کابل کې د پاکستان سفير منصور احمد خان د ياد شوي بمبارۍ له کبله ور غوښتی او د طالبانو د حکومت اعتراض یې ورسره شريک کړی دی.