تاند:( شنبه، د حمل ۲۷ مه) د افغانستان د بې واکه شوي ولسمشر محمد اشرف غني لومړي مرستيال امر الله صالح ډیورنډ فرضي کرښې ته څېرمه د افغانستان په مختلفو ولايتونو کې د پاکستان د الوتکو وروستیو بریدونو ته غبرګون ښودلی.
نوموړي د دې بریدونو له امله د پاکستان پر ځای په افغانستان کې د طالبانو حاکم رژیم ته د نيوکې ګوته نیولې او ویلي:« د کابل لاسپوڅې اداره د دغو بریدونو په اړه غبرګون نه شي ښودلی».
د افغانستان په خوست، پکتيکا او کونړ ولايتونو کې د پاکستاني ځواکونو د تیرې شپې د بريدونو په اړه طالبانو تر اوسه کوم غبرګون نه دی ښودلی.
د طالبانو ځينو سيمه ييزو وياندويانو يوازې دا بريدونه تاييد کړي، خو د تلفاتو د سطحې او وژل شويو کسانو د هويت په اړه یې څه نه دي ويلي.
په مختلفو راپورونو کې راغلي، چې د پاکستان په دغو بریدونو شاوخوا ۴۰ تنه وژلي دي.
د ټولنيزو رسنيو زياتو فعالانو د پاکستان دا بريدونه غندلي او په دې اړه يې د طالبانو چوپتيا د پوښتنې وړ ګڼلې ده.