تاند:( دوشنبه، د حمل ۲۲ مه) په کندهار او ننګرهار ولايتونو کې د يوه ځوان او يوې ماشومې د وژل کيدو خبرونه ورکړل شوي.
په کندهار کې د وژل شوي ځوان په اړه ځایي سرچينو ويلي، چې په اوومه امنيتي حوزه کې نا څرګندو موټر سايکل سپرو وسله والو ودرولی او بيا وژلی دی.
د طالبانو د امینه قومندانۍ وياند محمد آصف حکیمي د نوموړي وژل کیدل تایید کړي او ویلي، چې وژل شوی ځوان عام وګړی و.
حکيمي وايې، امنيتي ادارو د پېښې د عاملینو د نیولو هڅې پیل کړي دي.
بل لور ته: د ننګرهار په غني خیلو ولسوالۍ کې یوه درې کلنه نجلۍ نا پیژاندو کسانو تښتولې او وژلې ده.
یوه ځايي اوسیدونکي الفت شینواري
وویل، چې ياده نجلۍ پرون غرمه د «۲۶ مې ویالې» سیمه کې رامنځته شوې ده.
نوموړی وایي، د پېښې په اړه یې ځایي طالب چارواکو ته خبر ورکړی خو، تراوسه یې په اړه څوک نه دي نیول شوي.
په وروستيو کې له مختلفو ولايتونو څخه د داسې پېښو د زیاتېدو راپور ورکول کېږي، خو ادعا کیږي چې طالبانو د دوی په لاس د شویو قتلونو او نیونو تر څنګ د هر ډول امنيتي خبرونو په خپریدو بنديز لګولی دی.
د خبریالانو په اړه هم تل ویل کېږي، چې سختو فشارونو سره مخ دي، څو د ناوره امنيتي وضعیت پېښې رسنيزې نه کړي.
د طالبانو ځينې مشران او وياندويان تل ادعا کوي، چې نا امني او جګړه یې په افغانستان کې صفر کړې ده.