تاند(جمعه، د حمل ۱۹) د پاکستان صدراعظم عمران خان، چې د بې باورۍ له رایو سره مخامخ دی، یو وار بیا ادعا وکړه چې د امریکا د متحدو ایالتونو له لوري له واکه لېرې کېږي.

عمران خان تېره اوونۍ هم، مخکې تر دې چې له ولسمشر څخه وغواړي چې پارلمان منحل کړي، دې ته ورته ادعا کړې وه.

د پاکستان سترې محکمې هماغسي چې اټکل کېده د پارلمان د منحل کېدو په اړه د ولسمشر پرېکړه رد کړه ځکه چې عمران خان هغه مهال د پارلمان د منحل کېدو غوښتنه وکړه چې په پارلمان کې یې اکثریت له لاسه ورکړ او هرو مرو سلب اعتماد کېدو.

خو عمران خان نن شپه (جمعه) ملت ته به وینا کې وویل چې له سلب اعتماد کېدو وروسته به د پارلمان د غړیو په اکثریت نوی جوړېدونکی حکومت ونه مني او له خپلو پلویانو غواړي چې د یکشنبې په ورځ ماسخوتن مهال د اعتراض په دود واټونو ته راووځي.

عمران خان همداراز وویل، د پاکستان سفارت په اسلام اباد کې د بهرنیو چارو وزارت ته د امریکا پټ اسناد رالیږلي چې پر اساس یې امریکا غواړي دی له واکه ګوښه کړي.

عمران خان یو وار بیا وویل چې دا اسناد به ولس ته وښيي خو له دې کبله به هغه پټ شیفر هم څرګند شي چې په وسیله یې دا اسناد د پاکستان د باندنیو چارو وزارت ته رارسېدلي دي.

ده زیاته کړه، یوه امریکايي چارواکي په واشنګټن کې د پاکستان سفیر ته ویلي و چې عمران خان باید روسیې ته نه وای تللی.

د عمران خان په وینا دغه امریکايي چارواکي د پاکستان سفیر ته په پارلمان کې د عدم اعتماد موضوع هم وریاده کړې وه.

خو د امریکا د بهرنیو چارو وزارت ویندوی نیډ پرایس د عمران خان ادعا رد کړه.

پرایس په یوه خبري غونډه کې په دې اړه د پوښتنې په ځواب کې وویل چې «دا خبره حقیقت نه لري.»