تاند(شنبه، د حمل ۲۰) د افغانستان او نړۍ د کرکټ نامتو ستوري راشدخان د خیریه چارو لپاره د (RK 19) په نوم برانډ جوړ کړ او ویې ویل چې د دغه برانډ د جامو او نورو جنسونو د عاید پنځه سلنه به راشدخان بنسټ ته ځانګړې کړي.
د راشدخان فونډېشن یا بنسټ غیرانتفاعي دی (غیرحکومتي مرستندویه موسسه) او هدف یې د ټولنې د کمزورو او بېوزلو لاسنیوی دی.
د راشدخان بنسټ په افغانستان کې د روغتیا، پاکو اوبو، یتیمو ماشومانو ته د زده کړو او له بیوزلو ماشومانو سره د مرستې په برخو کې فعالیت کوي.
راشدخان، چې په یو ورځنیو لوبو کې تر بل هر لوبغاړي ژر سل ویکټونه پوره کړي او په شل اوره سیالیو کې د نړۍ لومړی درجه باولر دی، غواړي چې د آر کې ۱۹ برانډ په وسیله له یوې خوا خلک سپورت ته لېواله کړي او له بلې خوا د ټولنې کمزورو وګړو ته مرسته ورسوي.
دا برانډ به ورزشي پتلونونه (برزوګان)، نیکرونه، بوټونه، ټي شرتونه او نورو سپورتي جامې اړو وسایل ولري.