تاند (شنبه، د حمل ۱۳مه) د افغانستان کرکټ بورډ نن (شنبه) اعلان وکړ چې د پاکستان د کرکټ لوبډلې پخوانی کیپتان یونس خان یې د خپلې لوبډلې د بیټنګ روزونکی ګومارلی دی. یونس خان به په متحده عربي اماراتو کې له افغان ټیم سره د بیټنګ په برخه کې همکاري وکړي.
د افغانستان کرکټ بورډ دا پرېکړه څو ورځې وروسته له دې وکړه چې دې کرکټ بورډ د پاکستان د کرکټ پخوانی لوبغاړی عمرګل د باولینک روزونکی وګوماره.
ټاکل شوې ده چې یونس او عمرګل په متحده عربي اماراتو کې د افغانستان د کرکټ له ملي لوبډلې سره د روزنې په کمپ کې یوځای شي.
افغان لوبډله د مارچ په ۳۱ متحده عربي اماراتو ته لاړه او حاضردمه هلته په روزنه بوخته ده.
دا کمپ په بېلابېلو برخو کې د افغان لوبغاړو د روزنې لپاره یو ښه فرصت ګڼل کېږي.
د افغانستان کرکټ بورډ په وروستیو ورځو کې د انګلیستان پخوانی لوبغاړی ګراهام تورپ د سرروزونکي په توګه وټاکه. په پام کې ده چې نوموړی د اپریل په پای کې په متحده عربي اماراتو کې له افغان لوبغاړو سره تمرین پیل کړي.