تاند(شنبه، د حمل ۱۳) د ملګروملتو تجربه کار دیبلومات ریچارد بینت د افغانستان لپاره د ملګروملتو د بشري حقونو د شورا ځانګړي راپورتر وګومارل شو.
له دوو لسیزو وروسته دا د ملګروملتو د بشري حقونو د شورا له لوري لومړی ځل دی چې په افغانستان کې د بشري حقونو لپاره ځانګړی استازی ټاکي.
دې شورا د ښاغلي بینت د ګومارلو هدف په افغانستان کې د بشري حقونو د سرغړونو په اړه د سندونو ټولول او پر سرغړونو څارنه ښوولې ده.
ښاغلي بینت په یوه ټویټ کې تایید کړې چې په افغانستان کې د بشري حقونو د شورا استازی ګومارل شوی دی.
نوموړی د ملګروملتو د بشري حقونو په چارو کې یو تجربه کار راپورتر دی او په بېلابېلو هیوادونو کې همدا دنده اجرا کړې ده.
ده پخوا ویلي و چې د سوله غوښتونکو عملیاتو لپاره د بشري سرغړونو څارنه مهمه ده او باوري دی چې بشري حقونو ته پاملرنه د انسانانو په خټه کې ده.