تاند:(جمعه، د حمل پینځمه) د ملګرو ملتونو امنیت شورا نن، د طالبانو لخوا له شپږم ټولګي څخه د پورته نجونو ښوونځيو د تړل کیدو د پریکړې په اړه ځانګړې غونډه کوي.
د دې غونډې د ترسره کيدو اعلان نن په ملګرو ملتونو کې د ناروې د استازي دفتر وکړ.
تمه کيږي، چې دا غونډه له ماسپښين څخه وروسته کېږي.
د طالبانو پوهنې وزارت د حمل په درېیمه، په هېواد کې له شپږم ټولګي څخه د پورته نجونو ښوونځيو د پرانيستلو ژمنه ماته او ویې ویل چې د دغو ښوونځيو درسونه تر بلې خبرتیا پورې وځنډول شول.
د طالبانو په اعلاميه کې راغلي:«هر کله چې په دې اړه له شريعت او افغاني دود او کلتور سره سمه جامع طرحه جوړه او د اسلامي امارت د مشرتابه حکم وشي بيا به مکاتبو او ليسو ته رسما خبر ورکول شي.»
د طالبانو دغه پریکړه په ملي او نړيواله کچه له توندو غبرګونونو سره مخامخ شوې ده.
ملګرو ملتونو د دې پریکړې له کبله، طالبانو ته خبرداری ورکړی چې د نړيوالو او افغانانو پر وړاندې به بې باوره شي.
معلومه نه ده، چې د ملګرو ملتونو د امنیت شورا په نننۍ غونډه کې به د طالبانو د يادې پرېکړې پر وړاندې څه فيصله کيږي.