تاند(چهارشنبه، د حوت ۲۵ مه) په داسې حال کې چې د اوکراین ولسمشر ته په لومړي ځل له روسیې سره خبرې جدي او حقیقي ښکاره شوي، دا هیواد وايي چې د روسیې د یرغل له کبله اوکراین تراوسه پورې د څه باتدې ۵۰۰ ملیارد ډالرو تاوان کړی دی.
د اوکراین صدراعظم دنیس شمیهال وايي، روسیه باید له جګړې وروسته د جګړې تاوان او د اوکراین د بیارغولو لګښت ورکړي.
شمیهال، چې په پلازمېنه کییف کې د چک جمهوریت، پولنډ او سلووینیا له صدراعظمانو سره خبرې کولې، ونه ویل چې اوکراین حتي که په جګړه کې بریالی هم شي، څنګه به له روسیې تاوان اخلي، خو د نړۍ په بېلابېلو برخو کې یې د روسیې د شتمنیو ضبط کېدو ته اشاره وکړه.
امریکا او نورو لوېدیځو هیوادونو د روسیې د اسعاري زېرمو په شمول د هغو روسي ملیاردرانو شتمنۍ ضبط کړي چې له ولادیمیر پوتین سره نژدې اړیکې لري.
په همدې حال کې د اوکراین ولسمشر ولودیمیر زیلینسکي وايي، له روسیې سره د سولې خبرې په تدریج ورته حقیقي ښکاري خو نور وخت ته اړتیا ده چې په خبرو کې جدي پرمختګ وشي.
ده چې د فیسبوک له لارې خبرې کولې، د روسیې په وړاندې د بري لپاره د مرکچي پلاوي په شمول د ټولو اوکراینیانو همکاري ضروري وبلله.
اوکراین نن سهار اعلان وکړ چې «غاصبو» ځواکونو ته یې کلک ګوزارونه ورکړي دي.
د اوکراین پوځ ادعا کوي چې هوايي ځواک یې د روسیې ۳ جنګي الوتکې، یوه څرخکه، درې بې پېلوټه الوتکې او دوه توغندي ویجاړ کړي دي.
د اوکراین پوځ همداراز ویلي چې د روسیې ځواکونو روانه اوونۍ د اوکراین پر ګڼ نفوسو ښارونو بمباریو ته دوام ورکړ او له دونیڅک او لوهانسک څخه یې په څو جبهو کې د پرمختګ هڅې وکړې خو بریالي نه شول.
لوهانسک او دونیڅک د اوکراین د بېلتون غوښتونکو تر کنټرول لاندې سیمې دي.