تاند:(سې شنبه، د حوت ۲۴ مه) د افغانستان پخواني ولسمشر حامد کرزي د خیبر پښتونخوا په بنو کې د پښتنو د سترې قومي جرگې د جوړیدو او پریکړو هرکلی وکړ.
کرزي په يوه اعلاميه کې ويلي چې دغه ستره جرگه په سیمه او افغانستان کې د موجودو ستونزو د اوارولو لپاره نېک او اغېزمن گام بولي او د یادې جرگې د پرېکړه لیک کلک ملاتړ اعلانوي.
حامد کرزي همدارنګه په یاده ستره جرګه کې د ښځو پراخ گډون او په اقتصادي، سیاسي او فرهنگي چارو کې د ښځو د حقوقو د تامین لپاره د جرگې د سپارښتنو ستاینه کړې ده.
حامد کرزي او ګڼو افغان سياستوالو او د نظر خاوندانو تر دې مخکې هم طالبانو ته بیا- بيا مشوره ورکړې، چې د لوېې جرګې له جوړولو سره خپل حکومت ته مشروعیت تامين او د ملت د استازو په وسيله د افغانستان راتلونکی برخليک روښانه کړي.
د بنو جرګه پرون د يوه پريکړه ليک په خپرولو پای ته ورسېده، چې په پاکستان کې د پښتنو د ناوړه وضعیت د بيان او حل په اړه د غوښتنو تر څنګ پکې د افغانستان د کړکېچ د حل په اړه وړانديزونه شوي وو.
د جرګې کوربه توب د ملي عوامي ګوند مشر محمود خان اڅکزي کاوه او د نورو مخکښو ملتپالو پښتنو سياستوالو تر څنګ د پښتون ژغورنې غورځنګ رهبر منظور پښتین او ګڼو نورو ګډون پکې کړی و.
په دې جرګه کې د افغانستان په اړه ټينګار وشو، چې د اساسي قانون مطابق یې باید لویه جرګه جوړه شي، څو د ټاکنو له لارې په افغانستان کې د يوه منتخب جمهوري نظام جوړيدو ته لاره هواره کړي.
د جرګې په پرېکړه ليک کې د زور له لارې په افغانستان کې د واک د ترلاسه کولو د لړۍ په ختمیدو هم ټينګار وشو او له دې لارې د طالبانو پر واک ته رسېدو د نیوکې ترڅنګ د روان بشري ناورين د حل لپاره د پراخو هڅو غوښتنه وشوه.
د افغانستان واکمنو طالبانو په دې اړه څه نه دي ويلي، خو په ټولنیزو رسنیو کې په زرګونو افغانانو د يادې جرګې د پریکړو هرکلی کړی دی.
د دې جرګې د ترسره کيدو جريان يوازې د محمود خان اڅکزي له ټويټر پاڼې څخه څه باندې ۲ ميليونه کسانو ننداره کاوه.
د پاکستان رسنیو د دغه هیواد د استخباراتو په امر د جرګې خبرونه او ژوندی بهیر خپور نه کړ.