تاند:(سې شنبه، د حوت ۲۴ مه) د کندهار په سپین بولدک ولسوالۍ کې د ۴۵ مېلیونو افغانیو په لګښت د اوبو د بند د جوړولو چارې پیل شوې.
د طالبانو د کرنې وزارت مرستيال مولوي صدراعظم وايي چې دا بند د کرنې وزارت په بودجې جوړېږي چې د لسو مترو اوبو ځایولو او د ۴۰ زره جریبه ځمکې د خړوبولو ظرفیت به ولري.
د یاد بند نوم او نور جزییات نه دي روښانه شوي.
د طالبانو د کرنې او مالدارۍ وزارت چارواکو د اوبو مدیریت ته پاملرنه خپل يو مهم کاري لومړيتوب ګڼلی.
دا په داسې حال کې ده، چې د اوبو د مدیریت په اړه د بې واکه شوي ولسمشر محمد اشرف غني له واکمنۍ راهيسې له ايران سره د افغانستان اړيکې ترينګلې دي.
ايران او پاکستان دواړه له ډېرو کلونو راهيسې د افغانستان له پریمانه اوبو څخه وړیا ګټه اخلي او اوبه ور بهیږي.
په وروستيو کې د طالبانو او ایران ترمنځ هم په دې اړه د ناندريو راپورونه ورکړل شوي.