تاند(شنبه، د جوت ۲۱ مه) سعودي عربستان، چې د ډېرو اعدامونو له کبله د بشري حقونو د ټولنو له انتقادونو سره مخامخ دی، تازه ۸۱ تنه د تروریستي اقداماتو په تور اعدام کړل.
د سعودي عربستان دولتي خبري اژانس، سپا (SPA) وویل، په اعدام شویو کسانو کې ۷ تنه یمنیان او دوه سوریه وال هم شامل دي.
سپا د خپل هیواد د کورنیو چارو وزیر په قول ویلي چې په اعدام شویو کسانو کې ۳۷ د سعودي عربستان اتباع دي او د دولتي ځواکونو د ترور لپاره په هڅه، پر امنیتي پوستو، د پولیسو پر کاروانونو د بریدونو او پر یو شمېر کډوالو د بریدونو په جرم محکوم شوي وو.
د سعودي عربستان د کورنیو چارو وزارت ویلي چې اعدام شوي کسان په منحرفه لار روان وو او د اسلامي دولت (داعش) او حوثي یاغیانو په شمول یې د سعودي عربستان دښمنو ډلو ته خدمت کاوه.
دا ۸۱ تنه، چې په یوه ورځ اعدام شول، په سعودي عربستان کې د تېر کال تر ټولو اعدام شویو کسانو ډېر دي.
په ۲۰۲۱ کې په سعودي عربستان کې ۶۹ تنه اعدام شوي وو.
چین، ایران او سعودي عربستان د هغو هیوادونو په سر کې دي چې ډېر اعدامونه کوي.
د بشري حقونو موسسو په ځلونو سعودي عربستان د اعدامونو په خاطر غندلی دی. د بشري حقونو موسسې سعودي، ایران او چین په دې تورنوي چې ډېر ځلي د جنايي جرمونو په نوم خپل سیاسي مخالفان اعداموي.
په سعودي کې د تروریزم ترڅنګ، وسله والې غلا، د مخدرو موادو قاچاق، قتل او جنسي تېري ته د اعدام سزا ټاکل شوې ده. په دې هیواد کې د همجنسپالنې لپاره هم د اعدام سزا په پام کې نیول شوې ده.
امریکا بادار یې څه فرمایی؟ حقوق غرب څه وایي؟