تاند(چهارشنبه، د حوت ۱۸ مه) د ښځو د حقونو دوو فعالو افغان ښځو ظریفې غفاري او ناهید فرید ته د سې شنبې په ورځ په ابوظهبي کې د فوربس د ننګونکو (Changemaker Awards) جایزې ورکړای شوې.
اغلې غفاري د افغانستان یوه له لومړنیو ښاروالانو څخه وه. دا په ۲۶ کلنۍ کې د میدانښار ښارواله شوه او د زوړپالو له سختو مخالفتونو سره سره یې کار ته په بري دوام ورکړای شو.
دې ته د کار په لومړۍ ورځ د مرګ ګواښونه وشول. پلار یې ووژل شو. دا په خپله له څو مرګونو حملو روغه ووته. د طالبانو له واک ته رسېدو وروسته لوېدیځ ته لاړه خو یوه اوونۍ مخکې بېرته خپل هیواد ته ستنه شوه چې د ښځو د دفاع لپاره خپل ږغ پورته کړي.
د دې له دې اقدام سره ځینو سخت مخالفت وکړ خو ډېرو نورو وستایله.
ناهید فرید د طالبانو له واک ته رسېدو وروسته له خپلو درو ماشومانو سره له هیواده ووته خو په بهر کې یې د ښځو د حقونو او د ښځو په ګډون د حکومت د جوړېدو لپاره هلې ځلې وکړې.
اغلې غفاري باور لري چې له ۴۰ کاله جګړې وروسته له طالبانو سره د خبرو له لارې په افغانستان کې د سولې او ثبات امکان شته.