تاند:(چارشنبه، د حوت ۱۸ مه) د طالب موټر چلوونکو د بې احتياطۍ له کبله پرون (سې شنبې) په کابل او دایکنډي ولایتونو کې پر خلکو د طالبانو د دوو رینجرو د ورختو له کبله د يوه ډاکټر په ګډون دوه تنه وژل شوي دي.
د راپورونو پر اساس له دې پېښو څخه يوه یې د کابل ښار په لویدیځ، دشت برچي سيمه او بله یې د دایکنډي ولایت په مرکز نیلي ښار کې شوې ده.
په کابل کې د محمد اديب په نوم يوه کس رسنيو ته ويلي چې پلار یې د دشت برچي په ۲۰ متره سړک روان و چې د طالبانو تيز رینجر موټر پرې ختلی او وژلی یې دی.
سرچينې زياتوي چې د دايکنډي د مرکز د «شهرک جدید ـ بازار کهنه» کې بیا د طالبانو یو رینجر موټر د يوه ډاکټر پر موټر سايکل ختلی او وژلی یې دی.
ويل شوي چې په دې پېښه کې رینجر چلوونکی طالب هم ټپي شوی.
د دایکنډي امنیه قوماندان صدیق الله عابد ویلي چې د رینجر دا ټپي شوی ډریور په امنیه قومندانۍ کې د ځانګړې قطعې قوماندان دی.
د طالبانو له واکمنیدو سره د افغانستان په مختلفو سيمو کې ورته پېښې څه نا څه زیاتې شوي چې طالبانو يې د عاملانو د مجازاتو ژمنې کړي دي.