تاند:(چار شنبه، د حوت ۱۸ مه) د طالبانو د رياستالوزراء لومړي مرستيال ملا عبدالغني برادر اخوند د اقتصادي کمېسيون په نوبتي غونډه کې د ۷۶ ميليون افغانيو په لګښت د برښنا شرکت د MTU, CAT, Perkins جنراتورونو د ترميم امر کړی.
د ملا برادر اخند د دفتر په یوه اعلامیه کې راغلي، چې ملا برادر اخند د تدارکاتو ملي ادارې ته په دې برخه کې د جدي کار لارښوونه کړې ده.
په اعلامیه کې همداراز راغلي: «همدارنګه د اقتصادي کمېسيون لخوا د سوداګرۍ او صنعت وزارت ته دنده وسپارل شوه، څو په افغانستان کې د بهرنيو پانګوالو د پانګونې لپاره يوه منظمه او شفافه طرحه جوړه او اقتصادي کمېسیون ته یې د ارزونې لپاره وړاندې کړي.»
د يادو موضوعاتو په اړه طالبانو نور جزییات نه دي ورکړي.
په وروستيو کې د بریښنا شرکت طالب چارواکو د عوايدو د زياتوالي او د بريښنا د ضايعاتو او غلا د کمیدو خبر ورکړی، خو خلک ادعا لري چې طالبانو د عوایدو د زیاتوالي لپاره پر دوی فشار زیات کړی او د بریښنا له اصلي مصرف څخه د ډېرو لګښتونو پیسې ورڅخه اخلي.
بريښنا شرکت بيا په دې تړاو ادعاوې ناسمې بللي دي.
تیل خو هم قیمت شول او نور هم کیدای شی قیمته شی ، نو د جنراتورو چلول به ډیره ښه نتیجه ورنکړی