تاند (دوشنبه، د حوت۱۶مه) د خلق دیموکراتیک ګوند غړی او پخوانی دفاع وزیر شهنوار تڼی، چې د ثور د اوومې په کودتا کې یې مهم رول درلود، د ۷۲ کلونو په عمر ومړ.
شهنواز تڼي، نه یوازې د محمد داوودخان خلاف په کودتا کې رول درلود بلکې د ډاکتر نجیب الله خلاف په ناکامه کودتا کې یې هم هم برخه لرله.
شهنواز تڼی په ١٩٥٠ کال د خوست ولايت د تڼيو ولسوالۍ په درګۍ کلي کې زيږېدلی، ښوونځی یې هم همالته لوستی، د کابل له حربي لېسې څخه تر فارغېدو وروسته په حربي پوهنتون کې شامل او په ١٣٥٠ کال کې د دې پوهنتون له پلې پوهنځى فارغ شو. ټوروسته یې په پخواني شوروي اتحاد کې د قوماندانۍ او مسلکي مهارتونو په برخو کې پوځي زده کړې کړې دي.
جنرال تڼی له خپلو خلقي ملګرو سره د ١٩٨٩ کال په ډسمبر کې د دولتمشر نجيب الله خلاف کودتا وکړه، خو بريالی نه شو او پاکستان ته يې پناه يووړه .
ده په وروستیو کلونو کې د افغانستان د سولې غورځنګ ګوند جوړ کړ او په خپله یې مشر و.