تاند:(پنجشنبه، د کب دولسمه) د پاکستان تر قلمرو لاندې د ملي جمهوري غورځنګ ګوند مشر او پښتون سياستوال محسن داوړ په بنو کې د پښتونخوا ملي عوامي ګوند د مشر محمود خان اڅکزي په کوربه توب د پښتنو په ترسره کیدونکې قومي جرګه کې د ګډون اعلان وکړ.
د محمود خان اڅکزي د ګوند سرچينې وايي چې د نوموړي په مشرۍ، د پښتونخوا مي عوامي ګوند به د مارچ په يوولسمه، په بنو کې د پښتنو قامي جرګه جوړه کړي.
اڅکزی وايي، دا جرګه یې پښتنو ته د “ورپېښو ستونزو” د هواري لپاره وربللې ده.
ويل شوي چې ياده جرګه به دوه ورځې دوام وکړي او د پښتنو په عمومي وضعيت به پکې بحثونه او خبرې وشي.
د ملي جمهوري غورځنګ ګوند په یوه اعلامیه کې راغلي چې د جرګې جوړونکو ورسره لیدلي او په جرګه کې یې د ګډون بلنه ورکړې، چې دوی هم منلې ده.
په وروستيو کې د لر او بر پښتنو ترمنځ د نظر او عمل نيږدې والی زيات شوی.
تمه کيږي، چې په جرګه کې به د افغانستان په وضعیت او پکې د پاکستان د پراخو لاسوهنو په تړاو هم بحثونه وشي.