تاند:(سې شنبه، د کب لسمه) د افغانستان طالب چارواکو ويلي، چې سبا چارشنبه دغه بانک ١۴ ميليونه ډالره د ليلام په ډول پلوري.
د بانک د مطبوعاتي دفتر د معلوماتو په اساس، په شرايطو برابر صرافانو او تجارتي بانکونو ته بلنه ورکول کېږي چې په دغو داوطلبيوکې ګډون وکړي.
سرچینه زیاتوي: د داوطلبۍ ګټونکي مکلفيت لري چې خپل حسابونه د ورځې تر پايه پورې تصفيه کړي.
د بانک په اعلامیه کې راغلي، چې د معاملــو قسمي تر سره کول مجاز نه دى، د ليلام ګټونکي دې د خپل ذمت پيسې ټولې يوځاى نغدې او یا هم په حوالــــې سره په ټاکلې موده کې په بانک کې تحويلې کړي.
دا له کله چې طالبان واک ته رسېدلي دي، د افغانستان بانک له لوري لږترلږه درېیم ځل دی چې ډالر لیلاموي. د دغه بانک چارواکو تېره اونۍ د ۱۲ ميلون ډالرو د لیلام اعلان کړی و.
د ډالرو د لیلام دلیل په بازار کې د افغانیو د ارزښت ساتلو هڅه ښودل کېږي.
څو میاشتې وړاندې د ډالرو پر وړاندې د افغانيو بيه په بېساري ډول پریوتې وه، خو افغانستان ته د ملګرو ملتونو د اونيزو نقدو ډالرو د مرستې له پیل سره د افغانیو ارزښت په نسبي ډول بیرته ښه شوی دی.
ملګروملتو تېره اوونۍ وویل چې په تېرو شپږو میاشتو کې یې له افغانستان سره د دوو ملیارد ډالرو مرسته کړې ده.