تاند: ( يکشنبه ، د کب لومړۍ) د طالبانو د بهرنيو چارو وزارت وايي، چې ماليزيا په کابل کې د بشري او اقتصادي همکاريو لپاره دفتر پرانیزي.
د دغه وزارت په يوه اعلاميه کې راغلي، چې په دې اړه نن د مالیزیا د بهرنيو چارو وزير ځانګړي سلاکار داتو حاجي احمد اعظم عبدالرحمن د طالبانو د بهرنيو چارو وزير مولوي امیر خان متقي سره ليدلي دي.
ويل شوي، چې په لیدنه کې د اسلامي بانکدارۍ د پراختيا او دوه اړخيزو اړيکو د پراختيا په اړه هم خبرې شوي دي.
مالیزیایي استازي دا هم ویلي، چې د روانې فبرورۍ میاشتې په ۲۳ مه به د دوی د بشري مرستو یوه الوتکه کابل ته را ورسیږي.
ويل شوي، چې طالب وزير د مالیزیا له دې ژمنو څخه د مننې ترڅنګ غوښتنه کړې، چې دغه هېواد دې د افغانستان د طبي بوټو او وچې مېوې په بازار موندلو کې مرسته وکړي.
د مالیزیا د بهرنيو چارو وزير څو مياشتې مخکې په اسلام اباد کې د افغانستان په اړه د اسلامي همکاریو سازمان د غونډې په څنډه کې ويلي وو، چې يو شمېر هېوادونه به ژر د طالبانو حکومت په رسمیت وپیژني، خو تر اوسه یې په دې اړه اقدام نه دی کړی.