تاند: ( يکشنبه ، د کب لومړۍ) د طالبانو د پوهنې وزارت عزيزاحمد ریان په یوه تازه مرکه کې ویلي، چې په نوي کال کې د نجونو د ټولو ښوونځيو د پرانيستلو په اړه جدي دي.
هغه دغه راز ويلي، چې د ټولو زده کوونکو لپاره د خوندي زده کړو، اسانتياوو او یو شان تعليمي نصاب په اړه هم اقدامات کیږي.
نوموړي دا هم ويلي، چې له جدي مياشتې څخه د یونیسف ادارې له لوري د ښوونکو د معاشونو د ورکړې هڅه هم روانه ده.
عزيز احمد ریان هغه اوازې هم رد کړې، چې ګواکې ځینې ښوونکي طالبانو ګوښه کړي يا اضافه بست کړي دي.
د طالبانو د پوهنې وزارت ویاند په تعليمي نصاب کې د بدلون راپورونه هم ردوي او وايي، چې تېرو څو مياشتو کې شاوخوا اووه میلیونه نوي چاپ شوي کتابونه چې د ښوونځيو د مخکيني نصاب مطابق چاپ شوي له دوبۍ څخه هېواد ته لیږدول شوي دي.
دا په داسې حال کې ده، چې د طالبانو له واکمنیدو سره له شپږم ټولګي څخه پورته د نجونو ښوونځي تړل شوي او ميليونونه زده کوونکي د زده کړو له حقه محرومې شوې دي.
د اروپايي ټولنې استازو هم څه موده مخکې وویل، چې طالب پلاوي د دوحې په مذاکراتو کې ډاډ ورکړی، چې په راتلونکي پسرلي کې به تړل شوي ښوونځي بېرته پرانیزي.