تاند: ( يکشنبه ، د دلوې څلور ویشتمه) د کابل پوهنتون یوه استاد کامبخش نیکویي پر خپلې فیسبوک پاڼې د خپل کور د یوه بې نظمه عکس له خپرولو سره ویلي، چې پرون یې طالبانو پر کور چاپه اچولې ده.
د نوموړي په وينا، طالبانو یې هم مېرمنه او لور شکنجه کړي او مېرمنه یې یې په سر سخته ټپي شوې او هم ېې د کور ډېر توکي له ځان سره وړي دي.
د نیکویي په وینا، دا او مېرمنه یې یوازې ښوونکي دي او هېڅ کومې ډلې سره یې اړیکې نشته.
طالبانو د نوموړي د ادعا په اړه څه نه دي ويلي.
بل لور ته له غزني ولايت څخه راپورونه وايي، چې طالبانو د غزني پوهنتون یو بندي کړی استاد مصطفی فیاضي له شکنجې او بند څخه وروسته بیرته خوشې کړی دی.
د نوموړي کورنۍ نه دي ویلي، چې هغه طالبانو ولې بندي کړی و، خو ویلي چې له پینځو ورځو شکنجې څخه وروسته یې په ضمانت خوشې کړی دی.
په غزني کې د طالبانو له واکمنیدو وروسته، د پوهنتون دوه نور استادان نادرکه شوي او بيا وژل شوي، چې د یوه استاد له کورنۍ څخه تښتونکو د هغه د خوشې کیدو په بدل کې پیسې هم اخيستې وې.
طالبانو په دې اړه رسنيو ته څه نه دي ويلي.