تاند(پنجشنبې، د دلوې ۲۱ مه) نړیوالې هوايي – ملکي ادارې تر دوه سوه ډېر کورنۍ حیوانات بهر ته ولېږدول.
د دې ادارې له راپور سره سم، د روسیې کارګو یا باري هوايي شرکت له افغانستانه سلګونه پیشوګانې او سپي کاناډا ته وړي دي.
۱۵۶ سپي، او ۱۳۳ پیشوګانې په RA-76502 الوتکه کې د جنورۍ په ۳۰ له کابل څخه د کاناډا بریټش کولمبیا ته یووړل شول.
په راپور کې ویل شوي چې دا سپي او پیشوګانې د هغو دیپلوماتانو او پوځیانو دي چې د اګست په نیمايي کګې د طالبانو له لوري د کابل له نیولو وروسته له افغانستان څخه ووتل.
تر دې وړاندې د نوزاد په نوم د یوه پخواني بریتانیايي پوځي موسسې د خپل هیواد د حکومت په اجازه له کابل څخه ۱۴۰ سپي، ۶ پیشوګانې په ځانګړو الوتنو کې وایستلې.
دا کار په دې خاطر له سختو انتقادونو سره مخامخ شو چې ولې تر هغو انسانانو وړاندې، چې ژوند یې د طالبانو د واک ته رسېدو له کبله له خطر سره مخامخ و، حیوانات وایستل شول.
کاناډا ته وړل شوي حیوانات د وانکور ښار په نړیوال هوايي ډګر کې ځانګړو جوړو شویو ځایونو ته یووړل شول. له هغه ځایه به وروسته خپلو اصلي خاوندانو ته سپارل کېږي.