تاند: ( دوشنبه ، د دلوې اتلسمه)‏ ‏ ‏‏د‌ طالبانو د بهرنيو چارو وزارت د ملګرو ملتونو د امنیت شورا هغه راپور رد کړ، چې په افغانستان کې د بهرنيو ترهګرو ډلو د فعاليتونو د زياتيدو په اړه یې چمتو کړی و.

دغه راپور څو ورځې مخکې د افغانستان په اړه د امنيت شورا په ځانګړې غونډه کې شریک شوی و.

په راپور کې ادعا شوې وه، چې د القاعدې ډلې د بنسټګر زوی هم څه موده مخکې افغانستان ته سفر کړی او طالب چارواکو سره یې په دې هېواد کې د القاعدې ډلې د مرکزونو د جوړولو په اړه خبرې کړي دي.

د طالبانو د بهرنيو چارو وزارت په مشخص ډول په دې اړه له څه ویلو پرته ويلي، چې بهرني ترهګرې ډلې په افغانستان کې د فعالیت اجازه نه لري.

طالبانو ويلي، چې دوی پر افغانستان په بشپړه توګه واکمن دي او بشپړ امنيت یې تامين کړی دی.

د طالبانو په اعلامیه کې هيله څرګنده شوې، چې ملګري ملتونه باید مسوولانه څرګندونې ولري.