تاند: ( یکشنبه ، د دلوې اوولسمه) په افغانستان کې د ملګرو ملتونو د سرمنشي ځانګړې استازې مېرمن ديبورا لاينز نن د طالبانو د رییس الوزرا له سياسي مرستيال مولوي عبدالکبیر سره لیدلي.
د طالبانو د وياند مرستيال انعام الله سمنګاني ويلي، په دې لیدنه مېرمن ديبورا د روغتيا، پوهنې او بانکوالۍ په برخو کې د شویو پرمختګونو ستاينه کړې ده.
د سمنګاني په وينا، د يوناما دفتر مشرې همدا شان په راتلونکي پسرلي کې د نجونو د پوهنتونونو او ښوونځيو د پرانيستل کيدو هرکلی هم کړی دی.
طالب وياند زياتوي، چې د ملګرو ملتونو د سرمنشي ځانګړې استازې د دې لیدنې پر مهال له افغان ښوونکو سره د اروپايي ټولنې د ۵۰ ميليونه يورو خبر هم ورکړ.
هغې دا هم ویلي، چې يوناما له ملګرو ملتونو سره د افغانستان لپاره د ۴,۴ میلیارده ډالره بشري مرستې په راټولولو کې مرسته کوي.
سمنګاني تاييد کړی، چې د یوناما دفتر مشرې همدا شان د يو شمېر معترضو افغان مېرمنو په نادرکۍ اندیښنه ښودلې او له طالبانو څخه ېې د هغوی په موندلو کې مرسته غوښتې ده.
د طالب وياند په خبره، د طالبانو د رييس الوزرا سياسي مرستيال مولوي عبدالکبیر د یوناما مشرې ته ډاډ ورکړ، چې د دوی اړوندې ادارې به په دې برخه کې لازم اقدامات وکړي.
يوناما ادارې پر خپلې ټویټر پاڼې بیا لیکلي، چې د مولوي کبير سره یې د مشرې لیدنه تر ډېره د افغان معترضو ښځو د خوشې کولو په اړه پر خبرو متمرکزه وه.
د يوناما ټویټر پاڼه لیکي، چې مشرې ېې طالب چارواکي ته روښانه کړې، چې د افغانانو حقونو ته له درناوي پرته به د طالبانو لپاره نړیوال ملاتړ رامنځته نه شي.
د يوناما مشرې د معترضو مېرمنو د خوشې کولو په اړه د طالب چارواکي د ډاډ ورکولو له کبله مننه کړې ده.