تاند: ( سې شنبه ، د دلوې دولسمه) د بښنې نړیوال سازمان د طالبانو له حکومت څخه د اريانا تلويزون د نیول شویو خبریالانو د خوشې کیدو غوښتنه وکړه.
دغه سازمان په یوه اعلامیه کې ویلي، چې طالبان د معترضینو، بشري مدافعینو او خبريالانو نیولو ته دوام ورکوي.
د سرچينې په وينا، دا ټولې سرغړونې په داسې حال کې ترسره کیږي، چې طالبانو د ناروې ناسته کې د افغانانو د بشري وضعيت د ښه کیدو ژمنې کړي دي.
طالبانو تر اوسه د اريانا تلويزون د دوو خبریالانو د تېرې شپې د نيولو په اړه غبرګون نه دی ښودلی.
د اريانا تلويزون د خبري برخې مشر حسن یار ويلي، چې دوه خبریالان یې تېره شپه د طالبانو د استخباراتو له لوري دفتر نه د وتو پر مهال په وحشیانه ډول ونیول شول.
پرون په ننګرهار کې د جمهوري نظام پر مهال د ننګرهار د والي وياند عطاء الله خوږياڼی هم طالبانو نیولی و، چې له یو شمېر اعتراضونو وروسته بیرته خوشې شو.