تاند: ( سې شنبه ، د دلوې دولسمه) د افغانستان لپاره د روسیې د ولسمشر ځانګړي استازي ضمير کابلوف ويلي، چې پر طالبانو نړيوال باور زیاتیدونکی دی.
د هغه په وينا د طالبانو د حکومت د په رسميت پېژندلو ګامونه لنډ شوي دي.
کابلوف په تازه مرکه کې نه ده مشخصه کړې، چې کوم هېوادونه په کومو دلايلو د طالبانو د په رسميت پېژندلو لپاره لېواله شوي دي.
طالبان هم په وروستيو کې د نړیوال رسميت پیدا کولو لپاره ډېره هیله مندي ښيي.
دا په داسې حال کې ده، چې د دوی پر حکومت د بشري او ښځينه حقونو د پراخ نقض، د جمهوري نظام د منسوبينو د وژلو او د ملي مشروعيت د نه لرلو او ترهګرو ډلو سره د اړيکو د نه پرې کولو له کبله نیوکې په زیاتیدو دي.
طالبان بيا په دې اړه نیوکې بې بنسټه ګڼي.